Numbers 10

Amacilongo eSiliva

1UJehova wathi kuMosi: 2“Yenza amacilongo amabili ngesiliva esicanduliweyo, ukuze uwasebenzise nxa ubizela abako-Israyeli ndawonye lanxa izihonqo sezifanele ukususwa ukuba kuhanjwe. 3Kuzakuthi nxa amacilongo womabili angakhala sikhathi sinye, isizwe sonke sako-Israyeli sibuthane phambi kwakho esangweni leThente lokuHlanganela.

4Kungakhala elilodwa nje, abakhokheli – izinhloko zezizwana zako-Israyeli, kumele babuthane phambi kwakho. 5Nxa icilongo lingakhala kakhulu, izizwana ezihlala ezihonqweni ezisempumalanga zizasuka.

6Lingakhala kakhulu okwesibili izihonqo ezingeningizimu zizasuka. Ukukhala kakhulu kwecilongo kutsho ukuthi kakusukwe.

7Ekubuthanisweni kwabantu ndawonye, lizakhalisa amacilongo, kodwa kube lomahluko ukukhala kwawo.

8“Amadodana ka-Aroni, abaphristi, yibo abazatshaya amacilongo. Lesi siyisimiso esizakuma njalo kini lakuzizukulwane ezizayo.

9Nxa lisilwa impi lesitha esilincindezelayo elizweni lakini, lizakhalisa kakhulu amacilongo. Ngalokho uJehova uNkulunkulu wenu uzalikhumbula njalo lilanyulelwe ezitheni zenu.

10Njalo lasezikhathini zenu zentokozo – emadilini amisiweyo kanye lemikhosini yokuThwasa kwenyanga – lizakhalisa amacilongo phezu kwemihlatshelo yokutshiswa kanye leminikelo yobudlelwano, ngakho izakuba yisikhumbuzo senu phambi kukaNkulunkulu wenu. Mina nginguJehova uNkulunkulu wenu.”

Abako-Israyeli basuka eSinayi

11Ngosuku lwamatshumi amabili ngenyanga yesibili ngomnyaka wesibili, iyezi lasuka ngaphezu kweThabanikeli lobuFakazi. 12Ngalokho abako-Israyeli basuka eNkangala yaseSinayi bazula indawo ngendawo iyezi laze layakuma eNkangala yasePharani. 13Basuka, okwehlandla lakuqala ngokulaya kukaJehova ngoMosi.

14Izigaba zezihonqo zakoJuda zasuka kuqala, ngophawu lwazo. Zazilawulwa nguNahashoni indodana ka-Aminadabi.

15UNethaneli indodana kaZuwari ekhokhele izigaba zesizwana sika-Isakhari, 16kuthi u-Eliyabi indodana kaHeloni ekhokhele isigaba zesizwana sikaZebhuluni. 17Ngakho basebechitha ithabanikeli, kwathi amaGeshoni lamaMerari ayelithwala, lawo asuka.

18Kwalandela izigaba zezihonqo zikaRubheni, lazo zingaphansi kophawu lwazo. U-Elizuri indodana kaShedewuri wayekhokhele.

19UShelumiyeli indodana kaZurishadayi ekhokhele isigaba sesizwana sikaSimeyoni,

20kanti u-Eliyasafi indodana kaDewuweli wayekhokhele isigaba sesizwana sikaGadi.

21Kwasekusuka amaKhohathi, wona asuka ethwele izinto ezingcwele. Ithabanikeli kwakumele limiswe abako-Israyeli bengakafiki.

22Izigaba zezihonqo zika-Efrayimi zalandela, ngaphansi kophawu lwazo. Owayekhokhele ngu-Elishama indodana ka-Amihudi. 23UGamaliyeli indodana kaPhedazuri wayekhokhele isigaba sesizwana sikaManase, 24kanti u-Abhidani indodana kaGidiyoni wakhokhela isigaba sezihonqo zesizwana sikaBhenjamini.

25Ekucineni, beliviyo elalivimbe emuva kwazo zonke izigaba, kwaba ngabezihonqo zesizwana sikaDani, abasuka ekucineni labo bengaphansi kophawu lwabo. Owayekhokhele kwakungu-Ahiyezeri indodana ka-Amishadayi.

26UPhagiyeli indodana ka-Okhirani wayekhokhele isigaba sesizwana sika-Asheri,

27kanti u-Ahira indodana ka-Enani wayekhokhele isigaba sesizwana sikaNafthali.

28Lokhu kwakuyindlela yokulandelana kokuhamba kwezigaba zaba-Israyeli ekusukeni kwabo.

29UMosi wathi kuHobabi indodana kaRuweli ongumMidiyani uyisezala kaMosi, “Sesisuka sisiya elizweni lelo elatshiwo nguJehova ukuthi ‘Ngizalipha lona.’ Woza sihambe lawe thina sizakuphatha kuhle, uJehova uthembise abako-Israyeli izinto ezinhle.”

30Waphendula wathi, “Hatshi, angiyikuhamba, ngizabuyela kwelakithi ebantwini bakithi.”

31Kodwa uMosi wathi, “Ngiyakuncenga ungasuki phakathi kwethu. Nguwe owazi lapha okufanele sihlale khona enkangala, njalo ongaba ngamehlo ethu. 32Nxa ungahamba lathi, sizakwabelana lawe izinto ezinhle esiyabe siziphiwe nguJehova.”

33Ngakho basuka entabeni kaJehova bahamba okwezinsuku ezintathu. Ibhokisi lesivumelwano sikaJehova lahamba phambi kwabo okwalezozinsuku ezintathu ukubafunela indawo yokuphumula. 34Iyezi likaJehova lalisiba phezu kwabo emini lapho sebesuka ezihonqweni.

35Kwakusithi lapho ibhokisi lesivumelwano selisuka, uMosi athi, “Phakama, Jehova! Sengathi izitha zingahlakazeka; Sengathi izitha zakho zingabaleka phambi kwakho.”

36Kwakusithi lingema, athi, “Buya, Jehova, kuzinkulungwane zako-Israyeli ezingebalwe.”